कुठे शोधिसी रामेश्वर अन कुठे शोधिसी काशी
हृदयातील भगवंत राहीला, हृदयातून उपाशी

झाड फुलांनी आले बहरुन, तू न पाहीले डोळे उघडून
वर्षाकाठी पाऊस धारा, तुला न दिसला त्यात इशारा
काय तुला उपयोग आंधळ्या, दीप असून उशासी

रुद्राक्षांच्या गळ्यात माळा, लाविलेस तू भस्म कपाळा
कधी न घेऊन नांगर हाती, पिकविलेस मातीतून मोती
हाय अभाग्या भगवे नेसून घर सन्यासून जाशी

देव बोलतो बाळ मुखातून, देव डोलतो उंच पिकातून
कधी होऊनी देव भिकारी, अन्नासाठी आर्त पुकारी
अवती भवती असून दिसेना, शोधितोस आकाशी