हे चिंचेचे झाड दिसे मज चिनार वृक्षापरी
दिसशी तू नवतरुणी काश्मिरी

बघ निळसर पाणी झेलमचे झुळझुळे
हे गवत नव्हे गं पिवळे केशरमळे
हि किमया केवळ घडते प्रीतीमुळे
उघडे डोंगर आज हिमाचे मुकुट घालती शिरी
दिसशी तू ...

रुसलीस उगा का जवळी ये ना जरा
गा गीत बुलबुला माझ्या चिटपाखरा
हा राग खरा की नखर्‍याचा मोहरा
किती वार मी मरु तुझ्यावर, किती करु शायिरी

हर रंग दाविती, गुलाब गहिरे फिके
तुज दाल सरोवर दिसते का लाडके
पाण्यात तरंगे घरकुलसे होडके
त्यात बैसूनी मधुचंद्राची रात करु साजरी